Bölümler | Kategoriler | Konular | Üye Girişi | İletişim


Ferman Görmek İsteyen Var mı ?

Akdâ kudâti’l-müslimîn evlâ vülati’l-muvahhhidîn ma‛denü’l-fazli ve’l-yakîn râfi‛u a‛lâmi’ş-şerî‛ati ve’d-dîn vârisü ulûmi’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‛în Mevlânâ Halep kâdîsı zîdet fazâilühû ve iftihâru’l-emâcid ve’l-ekârim câmi‛u’l-mehâmid ve’l-mekârim el-muhtassu bi-mezîdi inâyeti’l-meliki’d-dâim dergâh-ı mu‛allâm kapucı başılarından hâlâ Halep mütesellimi dâme mecdühû ve mefâhiru’l-kudât ve’l-hukkâm me‛âdinü’l-fazli ve’l-kelâm Halep eyâletinin hâvî olduğı sâir kazâların kudât ve nüvvâbı zîde fazlühüm kıdvetü’l-emâcid ve’l-a‛yân zikri âtî asâkiri ihrâc ve savb-ı maksûda irsâl ve îsâl bu def‛a Dersa‛âdet’ümden mahsûs-ı mübâşir ta‛yîn olunan hâcegân-ı dîvân-ı hümâyûnumdan ve sadr-ı a‛zam mektubcusı hulefâsından Hüseyin zîde mecdühû mefâhiru’l-emâsil ve’l-akrân a‛yân ve zâbıtân ve bi’l-cümle iş erleri ve söz sâhibleri zîde mecdühüm tevkî‛-i refî‛-i hümâyûna vâsıl olıcak ma‛lûm olaki hâin-i dîn ü devlet ve arîş-i mülk ü millet olan moskov keferesinin ümmet-i Muhammed ve Memâlik-i Osmâniyye hakkında derkâr ve menvî-i zamîr-i habâset-semîri olan kasd ve mekr u mekîdini izhâr etmek efkâr-ı fâsidesiyle nehr-i Tuna’yı mürûr eyleyerek tahattî ve tecâvüze ictisâr ve mecbûl olduğı ihânet muktezâsınca şikestî-i beyze-i beyzâ-yı münevvere-i islâmiyyeye çalışmakdan idüği be-dîdâr olmakdan nâşî kefere-i mesfurenin kahr u tenkilleri esbâbının istihsâline dikkate farîza-i zimmet ve bu emrin husûli bu bâbda herkes makdûrunı sarf ile i‛lâ-i kelimeti’llâhi’l-ulyaya cehd ü sa‛y etmek rabtiye-i uhde-i diyânet idüği vâzıh ve âşikâr bi’l-fi‛il sadr-ı a‛zam-ı sütûde-şiyem vekîl-i mutlak zafer-rehberim vüzerâ ve vükelâ ve ricâl-i saltanat-ı seniyyem ve ser-gerdegân ve ocaklu ve bi’l-cümle sunuf-ı askeriyem ile müste‛înen bi’llâhi te‛âlâ deryâ kapudânım dahi külliyyetlü donanma-yı hümâyûnum sefâyini ashâbıyla bahren mukâbele ve kahr u tedmîr-i a‛dâya teşmîr-i sâmid-i mükennet üzre iseler de el-hâletü hâzihî hengâm-ı sayf-ı güzâr ve mevsim-i şitâ duhûl etmekde olduğundan kefere-i mesfure mecbûl olduğı hî ü desâyis iktizâsınca eyyâm-ı şitâda izhâr-ı mekr u mekîd ibtidâr eylemeği mûcib olan etvâr u girdârlarından ma‛lûm ve âşikâr ve eyyâm-ı şitâda mevsim-i sayfdan ziyâde kılâ‛ ve hudûd-ı hâkâniyyenin esbâb-ı takviye ve istihkâmları istihsâliyle kefere-i fecerenin îsâl-gezend ü hasâra fırsat-yâb olamamış vakt-i farâiz-i hâliyyeden olduğı bedîdâr ve vakt ü zamânıyla muhâfaza-i kılâ‛ ve muhârese-i sugur ve bukâ‛ zımnında her bir mahalden iktizâsına göre meştâ-yı askerî tertîb ve mu‛accelen ordu-yı hümâyûnum sevk u tesyîb ile istihkâm ve takviye-i hudûd serhaddâta sa‛y u ikdâm olunmak lâzıme-i maslahatınca olmağla siz ki mevlânâ ve mütesellim ve müte‛ayyinân ve sâir mûmâ ileyhimsiz eyâlet-i mezburenin hâvî olduğı kazâlardan meştâ içün süvârî olarak bin beş yüz nefer asâkir dahi tertîb ve meştâ-yı ordu-yı hümâyûna irsâli hususuna irâde-i kâtı‛a-i cihândârânem müte‛allik olup ol bâbda hatt-ı şerîf-i isâbet-redîf-i şehin-şâhânem şeref-bahş-ı sudûr olmak hasebiyle şeref-rîz-i sudûr olan hatt-ı şerîf-i mekremet-redîf-i şehriyârânem mûcebince mazmûn-ı emr-i celîli’l-kadrimde kat‛â te’hîr ve imâte-i vakt etmeksizin ve beyhude mevsim geçirmeksizin eyâlet-i mezkûrenin hâvî olduğı kazâlardan ol mikdâr asâkir tertîb ve mûmâ ileyhim başbuğluklarıyla vakt-i şitâ duhûlünden akdem kış ve yağmur ve yaş mevsimlerinden mukaddem bir gün evvel meştây-ı ordu-yı hümâyûnuma irsâli bi’l-ittifâk mezîd-i i‛tinâ ve dikkat etmeniz fermânım olmağın hâssaten rükâb-ı kâmyâbımdan işbu emr-i şerîfim ısdâr mübâşir-i mûmâ ileyhe irsâl olunmuşdur. İmdi bu husûsla husûsât-ı sâireye bir vecihle makîs olmayup emr-i gazâ vecihâd nusûs-ı kâtı‛a-i furkâniyye ile sâbit olup muktezâ-yı şerî‛at-i mutahhara emr-i cihâd cümleye farz-ı ayn olduğundan ve asâkir-i mezkûre eyyâm-ı şitâda muhârese-i sugur ve kılâ‛ zımnında mezîd ü matlûb idüğünden bu bâbda iğmâz ve rehâvet ve irtikâb-ı ta’ahhur ve betâetle ihrâc ve îsâllerinde tevekkuf olunmak ne derecelerde maslahata muvâfık idüği vâreste-i kayd ü iş‛âr ve ve bu bâbda betâetle hareket idenler haklarında müntec vehâmet ve garâbet olarak dünyâ ve ukbâda mes’ûl ve mu‛âkab olacakları vâzıh ve âşikâr olmağın vüsûl-i emr-i şerîfimin zinhar ve imâte-i vakt etmeyerek eyâlet-i mezkûrede ihrâcı fermânım olan iki bin beş yüz nefer süvârîyi bir gün evvel ihrâc ve mûmâ ileyhim başbuğluklarıyla ordu-yı hümâyûnuma isbâle bi’l-ittihâd ihtimâm u dikkat eylemeniz matlûb-ı kat‛î-yi mülûkânem idüği ma‛lûmunuz oldukda ber-vech-i muharrer amel ve hareket ile icrâ-yı irâde-i şâhâneme i‛tinâ ve dikkat ve iş bu emr-i dînde rehâveti tecvîz ile dârende-i mübtelâ-yı itâb olmakdan tefekküri hıyânet ve hilâfından ittikâ ve mübâ‛adet eyleyesiz. Ve sen ki mübâşir-i mûmâ ileyhsiz sen dahi bu emr-i ehemme me’mûr ve ta‛yînden (silik) serî‛an bu tarafdan hareket ve ol cânibe varup zikr olunan meştâ-yı asâkirînin bir neferi giru kalmayarak vakt geçirmeyerek ihrâc ve âcilen meştâ-yı ordu-yı hümâyûnuma sevk ve irsâl kaziyesine mebnî olmağla ona göre amel ve hareket ve itmâm-ı kâr-güzârı sadâkate sa‛y u dikkat ve nâ-medâyih hareket hudûsünü tecvîz ile sen dahi vahîmü’l-âkıbet olmakdan el-gâye ihrâz ve mücânebet eylemek bâbında fermân-ı vâcibü’l-ittibâ‛ ve lâzımü’l-imtisâlimin mazmûn-ı itâ‛at-makrûnıyla amel ve hareket ve hilâfından tevakkî ve mübâ‛adet eyleyesiz. Şöyle bilesiz alâmet-i şerîfe i‛timâd kılasız. Tahrîran fî evâsıt-ı şehri Ramazân-ı mübârek sene erba‛a ve ışrîn ve mieteyn ve elf. Mahrûse-i Kostantiniyye.
Mûcebince dîvân tezkeresi vârid olmuşdur.

Evet gördüm çok uzun bir tane seçmişim. Bir de kısasını eklerim inşallah.

Kullanılan dilin zarafetini ve bu günkü Türkçe ile aradaki farkı anlamamız için okumanızda fayda var. Sadeleştirilmemiş, harfler dışında orijinal sayılır.


Tarih

MollaCami.Com